قالولها ولادها ماتو حكايات صافي هاني

إننا نكون أقوى اتنين في الدنيا عشانهم.
دخلوا المطبخ ولقوا فريدة مبهدلة وشها كله بالشوكولاتة ويوسف بيضحك عليها بكل غل. إلهام جريت عليها وجابت منديل وقعدت تمسح وشها بحنان وأمومة طاغية، وأكرم واقف ساند على الرخامة وباصص للوحة دي وهو حاسس إن ثروته الحقيقية مش في البنوك ولا الشركات.. ثروته الحقيقية هي اللمة دي اللي كملت الليلة.
بعد ما العيال أكلوا وطلعوا أوضتهم عشان يناموا، إلهام طلعت وراهم، قرت لهم قصة لحد ما ناموا تماماً.. خرجت البلكونة بتاعة أوضتها وبصت للسما.. لقت ليل القاهرة صافي والنجوم منورة، ومفيش أي صوت مطر في خيالها.. صوت المطر القديم اللي كان بيفكرها بالوجع اختفى، وحل مكانه سلام نفسي حقيقي.
وفجأة تليفونها نوّر في إيدها.. شاشة السيرفر الخاصة ب نسمة حرية جابت إشعار جديد.. ملف كامل مبعوتلها من جهة مجهولة في السوق طالبين حماية سيبرانية لصفقة اقتصادية ضخمة بتبلغ قيمتها مليارات، ومستعدين يدفعوا الرقم اللي تطلبه.
إلهام ابتسمت بثقة وقوة، وقامت قافلة التليفون.. وبصت في اتجاه الجناح بتاع أكرم وقالت في سرها
اللعب مع الكبار لسه هيبدأ يا أكرم بيه.. والملكة مابتسيبش عرشها.
قفلت باب البلكونة ودخلت أوضتها،

وهي عارفة إن من بكره الصبح.. اسم إلهام الألفي هيزلزل السوق، مش بس كزوجة لأغنى ميلياردير، لكن كالعقل المدبر اللي هيحرك الإمبراطورية دي كلها بصباع واحد.
صوت العصافير ونور الشمس الهادي كان مالي الجناح الكبير بتاع إلهام. صحيت وخدت نفس عميق، قامت ولبست طقم فورمال شيك جداً، بنطلون أسود وبليزر أبيض، ولمت شعرها ديل حصان وبقت ملامحها حادة وجميلة في نفس الوقت.. ملامح سيدة أعمال من الطراز الأول.
وهي نازلة السلم، لقت أكرم واقف في الصالة الكبيرة لابس بدلته الرسمية الكحلي وجنبه رئيس الحرس وهو بيمضي على شوية ورق بسرعة. أول ما سمع صوت كعب جزمتها، رفع عينه وبصلها، ونظرة الإعجاب والإنبهار في عينيه زادت.. سحرها وقوتها بقوا بيكملوا هيبته وجبروته في السوق.
أكرم شاور للحرس يمشي، وقرب منها وقال بابتسامة خفيفة
صباح الخير يا مدام إلهام.. الطقم الفورمال ده وراه إيه؟ شكلك ناوية على مصيبة في البيزنس النهاردة.
إلهام ابتسمت بثقة وقالت
صباح النور يا أكرم بيه.. المصايب دي سيبناها لناس تانية. أنا النهاردة نازلة معاك الشركة.. مش إحنا بقينا شركاء قانونياً ونص أسهم شركة المقاولات بقت باسمي؟ أنا نازلة أستلم مكتبي وأشوف الشغل بيمشي إزاي.
أكرم ضحك وقال
ده أنا اللي المفروض أقلق كده.. تمام، عربيتك وحراستك جاهزين، وهنتحرك سوا.. بس قبل ما نمشي، المحامي بعتلي التقرير النهائي عن رأفت ومنصور وبسنت.
إلهام عينها ضيقت إيه الأخبار؟
أكرم حط إيده في جيبه وقال بجفاء
النيابة أمرت بحبسهم 15 يوم على ذمة التحقيق.. القضية مقفولة ومفيهاش ثغرة، والكلابشات مش هتتفك من إيديهم لسنين طويلة.. يعني صفحتهم اتقفلت تماماً.
إلهام هزت راسها بارتياح
كده نقدر نركز في اللي جاي.
وصلوا مقر مجموعة الألفي للاستثمار في التجمع الخامس.. برج زجاجي ضخم يهد الحيل. أول ما أكرم دخل وبجنبه إلهام، الموظفين كلهم وقفوا صفين وبيحنوا راسهم باحترام وخوف. أكرم مشي بكل هيبة لحد ما وصلوا لمكتب الإدارة العليا في آخر دور.
أكرم فتح باب مكتب كبير ومجهز بأحدث الأجهزة والشاشات وقالها
ده مكتبك.. من النهاردة أنتِ رئيسة مجلس إدارة قطاع التطوير والتأمين التكنولوجي للمجموعة كلها.
إلهام قعدت على الكرسي الجلد المريح، وفتحت اللابتوب بتاعها، وفي ثانية ربطته بالشاشات الكبيرة اللي في المكتب.. صوابعها بدأت تعزف على الكيبورد، ولفت بأناقة وبصت لأكرم اللي كان واقف ساند على الباب ومتابعها
عارف يا أكرم. . من خمس سنين كنت بموت في ضلمة ورعب، والنهاردة أنا بقيت الشريكة الوحيدة لأقوى راجل في البلد.. والسيستم بتاعي بقا هو اللي بيحمي إمبراطوريتك.
أكرم قرب منها ببطء، حط إيده على المكتب ومال عليها وقال بصوت واطي ومليان رجولة وثقة
أنا مكنتش متخيل إن اللعبة اللي بدأت بغدر من عيلتك، هتنتهي بإني ألاقي البنت اللي تدير دماغي ودماغ السوق كله.. أنتِ مابقتيش مجرد شريكة يا إلهام.. أنتِ بقيتي النور اللي دخل حياتي وحياة ولادي.. ومن النهاردة، إحنا الاتنين هنبقى القوة اللي مفيش مخلوق يقدر يقف قدامها.
إلهام وبصت في عينيه، ولأول مرة تحس بأمان حقيقي ملوش حدود.. حست إن القهر مات، وإن الحب والثقة بدأوا يكتبوا سطر جديد في حياتهم.
وفجأة الباب خبط، ودخل السكرتير وهو بيقول بلجلجة أكرم بيه.. الوفد الألماني وصل عشان توقيع أكبر صفقة في تاريخ الشركة.
أكرم لف وبص لإلهام، ومد إيده ليها جاهزة يا شريكة حياتي؟
إلهام وقفت بكل كبرياء، وحطت إيدها في إيده وقالت بابتسامة ساحرة
جاهزة.. خليهم يعرفوا مين هما الألفي.
وخرجوا هما الاتنين إيد في إيد، يوسف وفريدة في أمان في قصرهم، والماضي اتدفن ورا القضبان.. والرحلة الجديدة بدأت بقوة، وذكاء، وحب حقيقي ملوش مثيل.