صاحبي الاول

أطلقك؟! ده أنا غرقان يا أم ولادي، ده أنا جايلك مستنجد بيكي تحميني وتفكري معايا في المصيبة دي!
ابتسمت بسخرية موجعة، ابتسامة كسرة وشماتة في نفس الوقت، وقربت خطوة واحدة وهي بتبصلي من فوق لتحت
مشاكلك دي تلبسها لوحدك، ماليش دخل بيها من قريب ولا من بعيد! كنت جيت خدت رأيي وإنت رايح تدفع دم قلبك شبكة للبنت اللي فلقة قمر؟ كنت استشرتني وإنت بتفرش شقة الإيجار وتتفق مع صاحبك الواطي؟ كنت فكرت فيا وإنت عايشلك يومين حلوين على قفا كدبك عليا وإنك في مصلحة شغل؟ جايب وراك مصيبة وقفل باب، وجاي تعيط تحت رجلي ليه دلوقتي؟
شهقت بنَفَس مليان مرار وكملت بنبرة سمّمت روحي
ولا اوعى تكون فاكرني عبيطة؟! إنت جاي تحكيلي وتتباكى عشان أقولك معلش يا حبة عيني، وأمد إيدي أبيعلك دهبي ولا أكسر قرشين شقايا اللي شايلاهم للعيال عشان تروح تعالج بيهم الست هانم اللي كنت رايح تتسلى بيها؟!
صرخت فيا بحدة فزعتني أول ما شافتني بهز راسي بالنفي
ورقة طلاقي توصلي من غير شوشرة، والبيت ده متدخلوش تاني.. تشيل شيلتك وتغرق في وحلك بعيد عني وعن ولادي، وروح شوف بقى هتجيب حقن المستوردة منين لعروستك أم وش قمر!
سكتت، وصوت نَفَسها السريع كان هو الصوت الوحيد اللي بيشق صمت الشقة القاتل. حاولت أقف، ركبي كانت بتخبط في بعضها زي العيل الصغير، مديت إيدي عشان ألمس طرف عبايتها، أترجاها، بس رجعت خطوتين لورا بقرف كأنها شافت حشرة سامة.
اسمعيني بس يا أم العيال.. وحياة عيالنا اسمعيني، أنا استاهل الحرق، استاهل كل كلمة قولتيها، بس متخربيش البيت.. العيال ذنبهم إيه؟ أنا غلطت وروحي كانت في إيدي الليلة، دبريني!
ضحكت.. ضحكة مكتومة، طالعة من قاع قلب محروق، وهزت راسها بأسى
العيال؟! دلوقتي افتكرت العيال؟! وإنت رايح تدفع شقاهم شبكة للعروسة الجديدة كنت فاكرهم؟ وإنت بتكدب عليا وتقولي مصلحة شغل، مكنتش خايف عليهم؟ البيت ده اتخرب بالدقيقة اللي حطيت فيها إيدك في إيد أبوها، مش دلوقتي لما الحبل التف حوالين رقبتك!
شاورت بإيدها على باب الشقة، إيدها مكنتش بتترعش، كانت ثابتة بقوة عمري ما شفتها فيها طول سنين جوازنا
الباب اللي دخلت منه ده، تخرج منه حالاً. مش هتبات هنا دقيقة واحدة، ولا هتدخل على ولادي وإنت شايل ريحة الخيانة وخراب البيوت وراك. المحامي بتاعي هيتواصل معاك، والقرش اللي كان رايح للحقن المستوردة، هتدفعه غصب عنك نفقة ومصاريف للعيال اللي افتكرتهم على باب المصحة!
لفت ضهرها ومشيت ناحية أوضة الولاد، قبل ما تفتح الباب التفتت وبصتلي نظرة أخيرة، نظرة مفيهاش حتى غضب.. كان فيها فراغ موحش، فراغ بيقول إن الراجل اللي كان مالي عينها مات ومبقاش له أثر. دخلت وقفلت الباب وراها بهدوء تام، حتى مسمعتش صوت طقّة الترباس، كانت قفلة قاطعة، قفلة نهاية.
فضلت واقف لوحدي في الصالة، الهوا بارد، ريحة البيت اللي كان أماني بتخنقني، والموبايل في جيبي رن فجأة.. طلعته بإيد مرتعشة، لقيت رقم المستشفى بينور الشاشة، والممرض أو الدكتور هناك مستني يعرف هيتصرفوا إزاي في الكارثة اللي متسجلة باسمي؟
رجعت لورا خطوة، سحبت أكرّة الباب وخرجت للسلم وأنا حاسس إني عريان، خسرت كل حاجة في ليلة واحدة؛ مراتي، بيتي، احترامي لنفسي.. وبقيت خارج للشارع أواجه جحيم أنا اللي بنيته طوبة طوبة بطمعي وسذاجتي.
قفلت الباب ونزلت السلالم وأنا مش شايف قدامي، الدم كان بيغلي في عروقي لدرجة الودان اللي بتصفر. الخزي اللي حسيت بيه قدام مراتي اتحول في ثانية لنار غضب عامية، نار مش هتبرد غير لما أطربقها على دماغ النصابين اللي دمروا حياتي. ركبت عربيتي وسوقت زي المجنون على الطريق الزراعي، دايس بنزين على آخره، وعيني مش شايفة غير وش أبوها وهو بيتمسكن في كتب الكتاب، وصاحبي اللي رماني في المحرقة دي عشان يخلّص نسايبه من بلوتهم.
وصلت بلدهم مع أذان الفجر، البلد كانت لسه نايمة في سكون يغيظ، وأنا نازل من العربية أرزع الباب ورايا. مشيت بخطوات واسعة لحد ما وقفت قدام بيتهم، وبدل ما أخبط بالراحة، فضلت أضرب بإيديا ورجليا على الباب الخشب ضربات كانت كفيلة تكسره في ثواني، وصوتي طالع يعلّي على أذان الفجر في الحارة
افتح يا حاج صالح! افتح يا غشاش يا نصاب.. افتح بدل ما أهد البيت ده على نفوخك ونفوخ عيلتك!
الكلاب بدأت تهوهو في الحارة، وشبابيك البيوت اللي جمبهم اتفتحت، وجيرانهم بدأوا يطلوا بروسهم مستغربين الدوشة. شوية وصوت تكات الترباس اتسمعت، والباب اتفتح وطلع منه أبوها، لابس جلابيته وبيفرك في عينه، ووراه صاحبي اللي طلع بايت عندهم!
أول ما شفت وش صاحبي، الشياطين كلها نطت في وشي، هجمت عليه زي الطور الهايج وجبته من تلابيب جلابيته لزقته في الحيطة
بقى إنت يا واطي؟! إنت يا ابن الحرام تلبسني في قنبلة موقوتة عشان تخلص قرايبك؟! مريضة شيزوفرينيا ومحجوزة في مستشفى مجانين وعايزة تقتلني تلبسوهالي وتقولولي فلقة قمر وستر وغطا؟!
صاحبي اتفاجئ وحاول يفك إيدي بصعوبة وهو وشه محتقن، أما أبوها فبدل ما ينكسف أو يخاف من الفضيحة وسط الجيران اللي بدأوا يتجمعوا، لقيته بيرجع خطوة لورا ووشه بيتقلب لبرود وتبجح يقهر
نزل إيدك يا بني أدم إنت.. إنت فاكر نفسك داخل على ناس ملهاش ضهر ولا إيه؟ بنتي مفيهاش حاجة، بنتي سليمة وزي الفل، والكل عارف إنها بتجيلها خنقة وعصبية شوية من الحسد، ودكتور المستشفى اللي إنت مروحها له ده بيكبر الحكاية عشان يقلّب في فلوس!
فلوس وخنقة؟! زعقت فيها لدرجة إن صوتي اتشرخ وأنا بطلع تقرير المستشفى من جيبي وبرميه في وشه وسط الناس
بنتك شيزوفرينيا رسمي ومسجلة في المصحة بقالها شهور ومقطوع علاجها يا نصابين! كانت هتدبحني الليلة دي في الشقة، والبوليس والاسعاف اللي لحقوني منها! أنتوا بعتوهالي غش وتدليس عشان تشيلوني مصاريفها وتخلصوا من عارها!
أبوها داس على الورقة بجزمته، ورفع صباعه في وشي بنبرة كلها تهديد ومكر
صوتك ده ميعلاش هنا في بلدنا، والورقة دي تبلها وتشرب ميتها.. إنت دخلت برجلك وطلبت القرب، وكتبت الكتاب برضاك ودخلت بيها، يعني بنتي في عصمتك وشايلها لحم ودم وقانون.. وكلمة زيادة في حقها ولا محاولة إنك ترميها، قسماً بالله ما هتخرج من المركز ده سليم، وحق بنتي هناخده منك تالت ومتلت بالقانون وعُرف البلد!
الكلمات نزلت عليا زي جردل مية تلج.. اتلجمت مكاني وأنا شايف التبجح في عين الراجل، وصاحبي اللي نفض هدومه ووقف جمب حماه بيعدل ياقته وعينه مكسورة بس مليانة غدر، الجيران حوالينا اتلموا، عينهم عليا بغضب وعصبية بلديات؛ مش فارق معاهم تقرير مستشفى ولا غش وتدليس، فارق معاهم غريب واقف يزعق ويفضح بنت بلدهم على باب دارها.
حق إيه اللي تاخده مني؟! صوتي طلع مبحوح ومخنوق من كتر القهر، دي سرقة ونصب.. جواز باطل ومبني على غش، هرفع عليكم قضية تدليس وهسجنك إنت وهو، ومش دافع مليم لا في علاج ولا في غيره!
صاحبي قرب مني نص خطوة، ووطى صوته بفحيح أفعى وهو باصص في الأرض
ارقع بالصوت واعمل اللي تعمله يا صاحبي.. الورق في إيدك روح بيه النيابة، بس عما تثبت الغش وتلف في المحاكم سنين، هتكون البنت محبوسة في المستشفى بتهمة محاولة شروع في قتلك وإنت ملزم بنفقتها وعلاجها قانوناً، وأبوها هيطالب بمؤخرها وقايمتها اللي ماضيلهم عليها على بياض، ولا نسيت الوصلات اللي مضيتها يوم كتب الكتاب عشان ترضيهم؟ فوق.. إنت داخل المصيدة برجليك، وعيالك اللي سبتهم في القاهرة أولى بالقرشين اللي هتدور تصرفهم على المحاكم وفضايحك!
الدم هرب من وشي لما فكرت في وصولات الأمانة اللي كنت ماضي عليها بغبائي وعمايا يوم الفرح، الورق اللي كتبته عشان أطمن قلب أبوها زي ما صاحبي قالي وقتها! حسيت بقلبي بيسقط في رجليه، أنا مش
بس ضيعت مراتي وبيتي.. أنا سلمت رقبتي لعصابة محترفة، قانونياً أنا الزوج المسؤول، ولو سيبتها في المستشفى ومصرفتش عليها ممكن يلفقوا ليا إهمال أو يطالبوني بمؤخر وقايمة تكسر ضهري وتسجنني.
أبوها شاوره لشباب من عيلته كانوا بدأوا يقربوا، وقال بنبرة قاطعة فيها كل معاني التهديد
تركب عربيتك وتغور من هنا، تروح تدبر علاج بنتي وتصرف عليها بالتي هي أحسن.. بنتنا على ذمتك، وأي تقصير منك، قسماً برب العزة ما هيكون ليك مطرح أمان لا في شغلك ولا في
بيتك اللي في البندر.. يلا يا رجالة فضوا الليلة!
رجعت لورا خطوة خطوة، والرجالة حواليا بيحاصروني بعيونهم، كل خطوة كانت بتدوس على كرامتي وتفكرني بإن اللي يبيع بيته